1938க்கும் 1944க்கும் இடையில் 16 வயதுக்குக் குறைவான 15 லட்சம் சிறுவர்கள் நாஜிக்களால் கொல்லப்பட்டனர்.
நன்சுக் சங்கிலிச் சிலம்பம் செய்வது எப்படி?
1. பழைய ஒட்டடைக் குச்சியை எடுத்துக் கொண்டு அதை 16 அங்குலம் கொண்ட இரண்டு துண்டாக வெட்டிக் கொள்ளவும்.
2. ஒவ்வொன்றுக்குள்ளும் ஒரு அங்குல நீளத்துக்கு அடிப்பாகத்திலிருந்து துளையிட்டுக் கொள்ளவும்.
3. இரு துளைகளுக்குள் ஒரு கம்பியை நுழைத்து முனைகளைக் கட்டிக் கொள்ளவும்.
ஜேம்ஸ் கேன் ஒரு யூதர். தி காட் ஃபாதர் திரைப்படத்தில் சன்னி என்ற கதாபாத்திரத்தில் நடித்தார்.
சைமன் மற்றும் கர்ஃபன்கெல் ராக் இசைக் குழுவின் ஆர்ட் கர்ஃபன்கெல் சன்னியைப் போன்றவரே. அவரும் ஒரு யூதரே.
மெர்சிடிஸ் நிறுவனமும் பி.எம்.டபிள்யூ நிறுவனமும் புக்கன்வால்ட் வதைமுகாமில் இருந்த யூதக் கைதிகளைக் கொண்டு தமது கார்களை உற்பத்தி செய்தனர்.
ஃபோர்டும் அப்படித்தான்.
யூதர்கள் மீதான வேதியல்-விஷ வாயு பரிசோதனைகளைச் செய்ய ஜோசஃப் மென்கெல்லுக்கு பேயர் நிறுவனம் தான் விஷ வாயு வேதிப் பொருட்களைத் தந்து உதவியது. உங்களுடைய காலை கீறி அதில் அழுக்குகள், கண்ணாடித் துண்டுகள் ஆகியவற்றைத் திணித்து உங்களுக்கு என்ன ஆகிறது என்று பரிசோதனைகள் செய்து பார்ப்பார்.
மெர்சிடிஸ் அல்லது பி.எம்.டபிள்யூ அல்லது ஃபோர்ட் வாகனங்களை யூதர்கள் வாங்கக் கூடாது.
சில நேரங்களில் நாம் பேயர் நிறுவனத்தின் ஆஸ்பிரினை வாங்குகிறோம்.
தீனாவின் பெற்றோரிடம் இரண்டு மெர்சிடிஸ் கார்களும் வீட்டில் ஒரு நீச்சல் குளமும் இருக்கிறது.
கடந்த வருடம் தீனாவின் சகோதரியும் அம்மாவும் மூக்கு அறுவை சிகிச்சை செய்துகொண்டனர். (யூதர்களை நாஜிக்கள் அடையாளம் கண்டு கொடுமைப்படுத்தியதற்கு இந்த மூக்கு அமைப்பும் ஒரு காரணம்).
தீனாவும் அந்த அறுவை சிகிச்சை செய்துகொள்ள விரும்பினாள். ஆனால் 16 வயது முடிந்த பின்தான் செய்துகொள்ளவேண்டும் என்று அம்மா சொல்லிவிட்டார்.
யூதர் என்று சொல்லிக்கொள்ள வெட்கப்படுபவர்கள்தான் மூக்கு அறுவை சிகிச்சை செய்துகொள்வார்கள் என்று என் அம்மா சொல்லியிருக்கிறார்.
உங்கள் ஆண் குறியின் மேல், இரு பக்கமும் ஒட்டும் டேப்பை ஒட்டி பின் அதைப் பிடித்து இழுத்தால் நாஜிக்களிடம் நீங்கள் யூதர்கள் இல்லை என்பதைச் சொல்லிப் புரியவைக்க முடியும்.
இன்க்யுசிஷன் காலகட்டத்தில் கிறிஸ்தவத்துக்கு மதம் மாற மறுத்த ஒரே காரணத்தினால் ஆயிரக்கணக்கான யூதர்கள் கொல்லப்பட்டனர்.
அப்பறம்… இப்போது நீங்கள் ஷப்பாத்(ஸ்) விதிகளை மீறப் போகிறீர்கள் அப்படித்தானே?
ஹண்டினியும் யூதர்தான். அவருடைய நிஜப் பெயர் எரிக் வைஸ். அவர் ஒரு மாயா ஜாலக் கலைஞர். ஒருமுறை அவரை ஒரு பெட்டியில் போட்டு கை விலங்குகள் மாட்டி நீருக்குள் போட்டுவிட்டார்கள். அந்தப் பெட்டி வெளிப்புறமும் பூட்டப்பட்டிருந்தது. அதன் பின்னரும் அவர் உயிர் பிழைத்து வந்துவிட்டார்.
கை விலங்குகளின் எஜமான்/அரசன் என்று அவரை அழைத்தார்கள்.
நாஜி போல் தோற்றமளிக்க நீங்கள் உங்கள் கேசத்துக்கு சாயம் பூசிக் கொள்ளவேண்டும். அதன் பின்னரும் முடியின் அடிப்பாகம் கருமையாகவே இருக்கும். அதாவது நீங்கள் முழுமையாக உங்கள் அடையாளத்தை இழந்து இன்னொன்றுடன் கலந்துவிடுவதில்லை என்பது அது காட்டுகிறது.
உடைந்த கண்ணாடிகளின் இரவுக்குப் பின்னர் முப்பதாயிரம் யூதர்களை விலங்குகள் ஏற்றும் வண்டியில் அடைத்து வதைமுகாமுக்குக் கொண்டு சென்றார்கள். பலர் போகும் வழியிலேயே மூச்சு முட்டி இறந்துவிட்டனர்.
எனவே அப்படி ஏதேனும் வண்டியில் உங்களை அடைத்தால் ஜன்னலோர இடம் கிடைக்கும்படியாகப் பார்த்துக் கொள்ளுங்கள்.
அந்த வண்டிகளை வெளிப்புறம் பூட்டிவைப்பார்கள்.
ஹண்டினியின் தந்தை ஒரு ரப்பி – யூத மத போதகர். விஸ்கான்சினில் அவருக்கென்று தனியான யூத வழிபாட்டு மையமே இருக்கிறது.
வதைமுகாமுக்கு ஏற்றிச் செல்லும் வண்டி அங்கு சென்று சேர்ந்ததும் நாஜிக்கள் உங்களை இறங்கச் சொல்வார்கள். நீங்கள் நோய்வாய்ப்பட்டிருந்தால், கொலை முகம்களுக்கு அனுப்பிவிடுவார்கள். ஆரோக்கியமாக இருந்தால் கட்டாய உடல் உழைப்பு முகாமுக்கு அனுப்பிவைப்பார்கள்.
வதைமுகாமுக்குச் செல்லவேண்டுமென்றால் நீங்கள் ஆரோக்கியமானவராக இருந்தாகவேண்டும்.
டென்னிஸ் பந்தைக் கொண்டு வெடிகுண்டு தயாரிப்பது எப்படி?
1. டென்னிஸ் பந்தில் துளையிடவும்.
2. தீக்குச்சியின் வெடி மருந்துமுனையை நிறைய ஒடித்து அதனுள் போடவும்.
3. பந்தை வீசி எறியும்போது உள்ளே இருக்கும் தீக்குச்சி முனைகள் ஒன்றோடுஒன்று உரசி தீப்பொறி கிளம்பி பந்து வெடிக்கும்.
சாண்டி கேஃபாக்ஸ் ஒரு யூதர். டாட்ஜர் அணியின் பந்து எறியும் வீரர்.
கே: சுடுபவர்கள் போலந்துக்காரர்கள் என்பதை எப்படித் தெரிந்துகொள்வது?
பதில் : அவர்கள் வட்டமாக நின்றுகொண்டு சுட்டுத்தள்ளுவார்கள்.
வெட்டி வைத்த பிரமாண்ட சவக் குழியின் முனையில் நிற்க வைத்து சுட்டு வீழ்த்தும்போது தப்பிக்க ஒரு எளிய வழி இருக்கிறது. சரியாக சுடத்தொடங்கும் நொடியில் சுடப்பட்டதுபோல் குழிக்குள் விழுந்துவிடவேண்டும். அதன் பின் மேலே சுடப்பட்டு செத்து விழும் உடல்களுக்குக் கீழே இரவு வரும்வரை பொறுமையாக ஒளிந்து காத்திருக்கவேண்டும்.
ஹாலோகாஸ்ட் திரைப்படங்களில் பலர் அந்த மரணச் சவக்குழிக்குள் இருந்துகொண்டு வலியால் முனகுவார்கள். அப்படிச் செய்தால் நாஜி வீரர்கள் நெருங்கி வந்து மீண்டும் ஒரு ரவுண்ட் சுடுவார்கள். எனவே இரவு வரும்வரை பிணம் போல் அமைதியாகக் கிடக்கவேண்டும்.
ப்ரூஸ்லியால் ஒருவரை மூன்று வழிகளில் ஒரே அடியில் கொல்ல முடியும்.
1. நெற்றிப் பொட்டில் ஒற்றை கராத்தே அடி
2. தொண்டையில் ஒற்றை கராத்தே அடி
3. மூக்கில் ஒற்றைக் குத்து.
எல்லா யூதர்களும் தொழு நோய் பிடித்தவர்கள் என்று பழங்கால எகிப்தியர்கள் பழித்தனர். இரண்டயிரம் ஆண்டுகள் கழித்து வால்டரும் அதையே சொன்னார். நூறு ஆண்டுகள் கழித்து கார்ல் மார்ஸும் அதையே சொன்னார்.
மூட நம்பிக்கைக் கதைகள், மோசமான நடத்தை, காட்டுமிராண்டித்தனம் என எல்லாவற்றிலும் உலக நாடுகள் அனைத்தையும் விஞ்சிவிட்டீர்கள். நீங்கள் தண்டிக்கப்பட்டே ஆகவேண்டியவர்கள். அதுதான் உங்கள் தலையெழுத்து – வால்டர்.
வால்டர் அறிவொளி இயக்கம் என்று அறியப்படும் ஏதோ ஒன்றை ஆரம்பித்துவைத்தவராகச் சொல்லப்படுகிறார்.
கார்ல் மார்க்ஸின் தந்தை ஒரு யூதர்.
எகிப்தில் இருந்து யூதர்கள் உயிரைக் கையில் பிடித்துக் கொண்டு தப்பி ஓடியபோது நாய்கள் அவர்களைப் பார்த்துக் குரைக்கவில்லை; அதனால்தான் நாய்களுக்கு சொர்க்கத்தில் இடம் கிடைத்தது என்று ரப்பி பிரையர் சொன்னார்.
நாஜிக்கள் தமது நாய்களை யூதர்களைத் தேடித்தேடிக் கடிக்கும்படிப் பயிற்றுவைத்திருந்தனர்.
ஹிட்லரின் நாயின் பெயர் பிலண்டி.
நாஜி நாய்களுக்கு சொர்க்கம் கிடைக்காது.
ப்ரூஸ்லி தினமும் ஆறு மைல் ஓடுவார். பால், முட்டை, மாமிசம், பசுவின் ரத்தம் எல்லாவற்றையும் போட்டுக் கலக்கி சாப்பிடுவார்.
நீங்கள் கோஷராக இருந்தால், அதாவது யூத மத விதிகளின்படியான உணவுகளை மட்டுமே உண்பவராக இருந்தால், மில்க் ஷேக்களில் மாமிசம் சேர்க்கக்கூடாது.
நாஜிக்கள் ஒரு பிரபல யூத மத போதகர்-ரப்பியைச் சிறைப்பிடித்து அடிமை உழைப்பு முகாமுக்கு அனுப்பினர். அந்த ரப்பியை முன்னுதாரணமாக வைத்து ஒரு பாடம் கற்பிக்க விரும்பினர். அனைத்து யூதர்களின் முன்னால் அவர்களுடைய மதம் தடை செய்திருந்த மாமிசத் துண்டைச் சாப்பிடச் சொல்லி கட்டாயப்படுத்தினர். நான் இதைச் சாப்பிட மாட்டேன் என்று ரப்பி சொன்னார். நாஜிக்கள் சட்டென்று அவருடைய நெற்றிப் பொட்டில் சுட்டுக் கொன்றுவிட்டார்கள்.
நீங்கள் சீஸ் பர்கர் சாப்பிட விரும்புகிறீர்கள் இல்லையா என்று கேட்கிறார் ரப்பி பிரையர்.
ஆஸ்த்ரியாவில் ஐம்பதாயிம் யூதர்கள் படுகொலை செய்யப்பட்டனர். ருமேனியாவில் மூன்று லட்சம் யூதர்கள் படுகொலை செய்யப்பட்டனர். ஒரு லட்சத்து நாற்பதாயிரம் யூதர்கள் ஜெர்மனியில் கொல்லப்பட்டனர். போலந்தில் முப்பது லட்சம் யூதர்கள் கொல்லப்பட்டனர்.
கெவினின் குடும்பத்தினர் போலந்திலிருந்து வந்தவர்கள்.
க்ரெளசோ மார்க்ஸ் ஒரு யூதர். அவருடைய உண்மையான பெயர் ஜூலியஸ் ஹென்றி மார்க்ஸ். சிகோவின் நிஜப் பெயர் லியனார்ட்.
கீழ்ப்படிதலுள்ள யூதர், கீழ்ப்படியாத யூதர் என்றெல்லாம் நாஜிக்கள் பிரித்துப் பார்க்கவில்லை. மூன்று (தலைமுறை) யூத தாத்தா பாட்டி இருக்கும் ஒருவர் யூதரே.
வழிபாட்டு நேர தொப்பியை எளிதில் கழற்றி வைத்துவிடலாம் என்று நினைக்கிறாயா… கேட்கிறார் ரப்பி பிரையர்.
கெவின் என்னுடைய தொப்பியை பொட்டை தொப்பி என்று கேலி செய்வான். நான் பொட்டைப் பையன்.
கெவின் நாஜி படையில் சேர்ந்தால் முதல் வேலையாக என்னையும் தீனாவையும் அவன் வீட்டுப் பரணில் தேடும்படி கேட்டுக்கொள்வான். ஆனால், நாங்கள் அதற்குள் போலந்து போய்விட்டிருப்போம்.
ஆன்னி ஃப்ராங்க்கின் குடும்பம் பெர்ஜன் பெல்சனில் இருக்குமிடமானது நாஜிக்களுக்கு யாரோ சொன்னதையடுத்தே ஆன்னி கொல்லப்பட்டார். எனவே எங்கு போகிறீர்கள் என்பதை நீங்கள் யாருக்கும் சொல்லக்கூடாது.
அவை உண்மையில் ஷவர்கள் இல்லை (விஷ வாயு பீய்ச்சும் கருவிகள்).
வார்சாவை வதைமுகாமாக ஆக்கியதுபோல் நியூ யார்க் நகரத்தையும் வதைமுகாமாக அவர்கள் ஆக்கக்கூடும். நீங்கள் ஒரு பெரிய நகரில் வாழ்கிறீர்களென்றால் அங்கு வேறு நிறைய யூதர்கள் இருக்கிறார்களென்றால் ஹாலோகாஸ்ட் பெரும் கலவரம் மூண்டால் உடனே அங்கிருந்து தப்பி ஓடிவிடுங்கள்.
வேறு சில நகரங்களும் வதைமுகாமாக வாய்ப்பு உண்டு: லாஸ் ஏஞ்செல்ஸ், சிகாகோ, பிலடெல்ஃபியா, போஸ்டன், சான் ஃப்ரான்சிஸ்கோ.
இங்கிலாந்தைக் கைப்பற்றினால் லண்டன் கூட வதைமுகாமாகிவிடும்.
அமெரிக்காவை ஜெர்மானியர்கள் அமரிகா என்பார்கள்.
’ஆம்புலன்ஸ்’ என்ற ஒரு திரைப்படத்தை ரப்பிகள் காட்டினர். சில யூதக் குழந்தைகளும் ஆசிரியரும் ஒரு ஆம்புலன்ஸில் கட்டாயமாக ஏற்றப்படுகிறார்கள். டாக்டர்கள் அவர்களைப் பூட்டிப் போட்டார்கள். ஒரு டிரக்கின் புகைப் போக்கியில் ஒரு குழாயை இணைத்து அதை ஆம்புலன்ஸின் பின் கதவில் பொருத்திவிட்டு போய்விட்டார்கள்.
மூச்சடக்கும் போட்டியில் உலக சாதனை என்பது எட்டு நிமிடம் ஆறு விநாடிகள். ஹன்டினியால் 12 நிமிடங்களுக்கு மூச்சை அடக்கிக் கொண்டிருக்க முடியும் என்று சிலர் சொன்னார்கள்.
ஒரு கண்ணாடி பாட்டிலை எடுத்து கேஸ்லினால் அதை நிரப்புங்கள். சாக்குத்துணையை திரி போல் திணியுங்கள். லேசாக நெருப்பு பற்றவைத்து தூக்கி எறிந்தால் வெடி குண்டு போல் வெடித்துச் சிதறும்.
ரப்பி சானன்யாவை எரிக்கும் முன் ரோமானியர்கள் அவருடைய உடம்பை டோரா புனித நூல் சுருள்களைக் கொண்டு சுற்றினார்கள். நீரில் நனைத்த பஞ்சை அவருடைய நெஞ்சுக்கு பக்கத்தில் பொதிந்து வைத்துப் பின்னர் தீவைத்தனர். அப்போதுதான் இதயம் சீக்கிரம் எரிந்து கருகாமல் முழு வலியையும் அவர் அனுபவிக்க முடியும் என்பதால் அப்படிச் செய்தனர்.
ஹடினியின் உறவினர் தி த்ரீ ஸ்டூஜஸ் படத்தில் நடித்த மோயியைத் திருமணம் செய்துகொண்டார். மோயியின் நிஜப் பெயர் மோசஸ் ஹரோவிட்ஸ். அவர் ஒரு யூதர்.
லாரி மற்றும் கர்லியும் யூதர்களே.
மிஸ்னா என்ன சொல்கிறதென்றால், கடவுளிடம் நமது முது மூதாதை ஐசக், ’இந்த உலகில் துயரங்களைக் கொண்டுவாருங்கள். அதுதான் உங்களைத் தொடர்ந்து நினைக்க வைக்கும்’ என்று வேண்டிக் கொண்டார். நல்ல யோசனையாக இருக்கிறதே என்று பாராட்டிய கடவுள் ஐசக்கை உடனே குருடாக்கினார்.
தம்மைத் தாமே கோமாளியாக்கிக் கொள்பவர்களை யார்தான் கொல்ல விரும்புவார்கள்?
குற்றுயிரும் குலை உயிருமாக இருக்கும் யூதர்கள் மீது சில நேரங்களில் நாஜிகள் நாயை அவிழ்த்துவிடுவார்கள்.
ஒரு நாய் உங்களைத் தாக்காமல் இருக்கவேண்டுமா… உங்கள் விரலை அதன் பின் பக்கத்தில் வேகமாகச் சொருகுங்கள்.
நிஞ்சாக்கள் அதை மறைவான இலை தந்திரம் என்று கெளரவமாக அழைப்பார்கள்.
பில்லி ஐடல் ஒரு நாஜி என்று கேள்விப்பட்டிருக்கிறேன்.
டேவிட் போவியும்.
ஹடினியின் அப்பா மிக அதிக அளவுக்கு மத விசுவாசத்துடன் இருப்பதாகச் சொல்லி நீக்கப்பட்டார்.
க்யூபா அடைக்கலம் தேடி வந்த ஆயிரம் யூத அகதிகள் இருந்த படகை திருப்பி அனுப்பியது. அமெரிக்காவும் அப்படியே செய்தது. துருக்கியும் அதையே செய்தது. ஸ்விட்சர்லாந்து 30000 யூதர்களைத் திருப்பி அனுப்பியது.
1492-ல் ஸ்பெயினிலிருந்து யூதர்கள் விரட்டியடிக்கப்பட்டனர். அராபிய மூர்களும் அப்படியே செய்தனர்.
இரண்டாம் உலகப் போரின் முடிவில் ஹிட்லர் தற்கொலை செய்துகொண்டான்.
ஹுட்லர் இறப்பதற்கு முன் தன் நாய் பிலண்டியைக் கொன்றுவிட்டான். ஏனென்றால், மற்றவர்கள் கையில் மாட்டிக் கொண்டு அது கஷ்டப்பட விரும்பவில்லை.
1943-ல் நடைபெற்ற வாக்கெடுப்பில் 30% மக்கள் இருபது லட்சம் யூதர்கள் ஐரோப்பாவில் கொல்லப்பட்டனர் என்பதை வெறும் வதந்தி என்று சொல்லி வாக்களித்திருக்கிறார்கள்.
கார்ல் பிராண்ட் ஒரு நாஜி மருத்துவன். அவனைச் சிறைப்பிடித்து போர்க்குற்றங்களுக்காக தூக்கிலிட்டனர். இதற்காகத் தூக்கு மேடையில் நிற்பதில் எந்த அவமானமும் இல்லை என்றான்.
ஹாலோகாஸ்டின் போது, க்ளாஸ் ஷில்லிங் என்ற நாஜி மருத்துவன் ஆயிரக்கணக்கான யூதர்களுக்கு மலேரியா நோய் தொற்ற வைத்து ’ஆராய்ச்சி’ செய்தான். நியூரன்பர்க் விசாரணையின்போது, ’என் ஆராய்ச்சியை செய்து முடிக்க அனுமதியுங்கள்’ என்று கேட்டான்.
ஒரு ஜெர்மானிய அதிகாரி உள்ளூரில் இருந்த யூத மத போதகர்-ரப்பி வழங்கிய பாஸ்கோ விருந்துக்குச் சென்றிருக்கிறார். மதச் சொற்பொழிவுகள் நீண்டுகொண்டே போனது. நம் அதிகாரிக்கு பசி வயிற்றைக் கிள்ளியது. இறுதியாக ரப்பியின் மனைவி, பதார்த்தங்கள் நிரம்பிய தட்டை எடுத்துக் கொண்டுவந்தார். ஜெர்மானியர் ஒரு வாய் எடுத்து சாப்பிட்டுப் பார்த்தார். ”என்ன முட்டாள்கள் இவர்கள். இவ்வளவு நேரம் காத்திருந்தது இந்த கசப்புக் கீரைகளைத் திங்கத்தானா?’ என்று கோபத்தில் கத்தியபடியே வீட்டை விட்டு வெளியேறிவிட்டார். ”என்ன ஒரு முட்டாள்… ஒரு நிமிடம் தாமதித்திருந்தால் அந்த கசப்புக் கீரையைத் தொடர்ந்து அதி அற்புதமான சுவைகொண்ட பதார்த்தங்கள் வரிசை கட்டி வந்திருக்குமே’ என்றார் ரப்பி.
அமெரிக்கர்கள் வதைமுகாம்களில் இருந்து விடுவித்தபோது எரி அடுப்பில் பலருடைய உடம்புகள் எரிந்துகொண்டிருந்தன.
வதை முகாம்களில் இருந்து மக்களைக் காப்பாற்றிய அமெரிக்கப் படைவீரர்களில் பெரும்பாலானவர்கள் கறுப்பர்கள்.
நீங்கள் கறுப்பராக இருந்து நாஜிக்கள் உங்களைச் சிறைப்பிடித்துவிட்டால், உங்களை காயடித்துவிடுவார்கள். அதாவது உங்களுக்கு குழந்தைகள் பிறக்க முடியாமல் செய்துவிடுவார்கள்.
இதுதான் யூதர்களின் ஒட்டு மொத்த வரலாறு என்று சொன்னார் ரப்பி பிரையர்.
வதைமுகாம்களில் கொல்லப்பட்டிருக்கவில்லையென்றால் என் குடும்பத்தினரும் மியாமிக்கு வந்து சேருவார்கள். அங்கு ஒரு பெரிய பண்ணை வீட்டை வாங்குவோம். ஒரு டென்னிஸ் மைதானம், நீச்சல் குளம் எலாம் இருக்கும். மெர்சிடிஸ், ஃபோர்டு அல்லாத கார் இருக்கும். கெவின் நாஜி படையில் சேர்ந்திருக்காவிட்டால் அவன் எங்களை வந்து பார்ப்பான். நாங்கள் கடற்கரையில் வண்டிகள் ஓட்டி அல்லது வேறு ஏதேனும் விளையாடுவோம்
ஹாலோகாஸ்ட் முடிந்து ஏழு ஆண்டுகள் கழித்து நான்கு லட்சம் ரஷ்ய யூதர்கள் சைபீரிய வதை முகாமுக்கு அனுப்பப்பட்டனர்.
இன்று மெய்ன் காம்ஃப் (என் போராட்டம்- ஹிட்லர் எழுதியது) நூல் மத்திய கிழக்கு நாடுகளில் சக்கை போடு போடுகிறது.
ஜெர்மனியில் உள்ள சுவர் வாசகம் : ஆறு லட்சம் (யூதர் கொல்லப்பட்டது) பத்தாது.
ஃப்ரான்ஸில் உள்ள சுவர் வாசகம் : யூதர்களைக் கொல்லு
அமெரிக்காவில் உள்ள சுவர் வாசகம் : இஸ்ரேல் = நாஜிகள்
பெரும்பாலான நேரங்களில் ஹடினியிடம் சாவிகள் இருந்தன.
கேம் ஆஃப் டெத் திரைப்படத்தில் கரீம் அப்துல் ஜாபருடன் புரூஸ்லி சண்டை போடும் காட்சிகளில் இடம்பெற்றது நிஜ புரூஸ்லி அல்ல. ஏனென்றால் அவர் அதற்கு முன் இறந்துவிட்டார்.
வழியில் வரும் வாகனத்தை நிறுத்தி ஏறிச் செல்வது தொடர்பான ஆலோசனைகள்:
1. மிகப் பெரிய அட்டையில் எழுதிக் கொள்ளுங்கள்.
2. நெடுஞ்சாலையின் முகப்பு பகுதியில் நில்லுங்கள்.
3. புன்னகை புரியுங்கள்.
4. கார் நின்று உங்களை ஏற்றிக் கொள்ள இடம் இருக்குமிடமாகப் பார்த்து நில்லுங்கள்.
5. தீனா போல் யாரேனும் தோழிகளை அழைத்து வர முடிந்தால் நல்லது.
ஃப்ளோரிடா மாகாணம் இஸ்ரேலில் இருந்து 6,6000 மைல் தொலைவில் இருக்கிறது. நல்லது. நாங்கள் என்றேனும் ஜெருசலேம் செல்வோம். அங்கு கிங் டேவிட் ஹோட்டலில் தங்குவோம். தீனா ஒவ்வொரு ஆண்டும் பாஸ்கா விழாவின்போது அங்கு சென்று வருகிறாள். அங்கு அவர்களுடைய வீட்டில் டென்னிஸ் மைதானமும் நீச்சல் குளமும் இருக்கிறது.
0
Holocaust Tips for Kids (Beware of God) by Auslander Shalom
